Meeting tuahning

Meeting tuahdan

 

By  Dr. Sang Awr

 

Biathaitthi : Khrihfabu hrauinak ah phungchim le thlacam lawng in aza lo. Khrihfabu tthan cho nak caah biaceih le khuakhan a herh. Meting tuah hi tthan cho phunkhat asi. Zeicatiah biakhiahmi nih thil ttha tampi a chuah pi. Meting ahcun mizapi le mitam deuh ruahnak kha lak asi caah a tthahnem nak a um. Asinain meting a tuahzia kan thiam lo tikah buainak achuahpi lio caan a um ve ton. Hmailei tthanchonak vial te hi meting khuakhan nak in a chuak mi asi caah zohdawhte le tthahnem santlai ngai in tuah thiam aherh. A bik in Baptist Khrihfabu hi meting a uar ngai mi kan si. Kan meting tuah hi a sau tuk tawn. Cunglei ukmi si loin mah tein baiceih khuakhannak nawl kan ngeih caah ceihkhan awk atam tuk cazawng ah asi. Cun ceihawk atam lawng asi loin meting tuah kan thiam lo cazawng ah asi. Meting tuahning hi cauk nganpipi in an chuah mi asi nain a herh deuh tete kan hun langhter lai.

 

2. Meting tuahning cauk hi(Robert;s rules and order) : Meting tuahning cauk parliamentary procedures hi American ralbawi Henry M. Robert nih 1863 ah a rak ttial mi asi. Amin Ah Robert ;s rules of Order anti. A mah hi Khrihfa ttha ngai asi i,upa hmaizahmi asi bantukin Khrihfabu he a pehtlaihmi meting pakhat ah chairman tuan an fial. Uknah leihe adang deuh caah a thiam lo i Biaknak lei meting tuahning cauk pakhat tial a herh ti kha a lungchung ah achuak. Khrifa meeting asiloah cozah asi lomi Non_Governmental Organizations(NGO) hna caah meting tuahnak ah hmankhawh dingin cauk attial. Mah cauk cu cherhchan lak ceu in nihin ni tiang vawleipumpi in hman asi. Hi cauk hi catlap hmai 176 asi nain a hnuah hrilhfiah an tialchap lengmang i hmai 600 tiang achuak. Kanmah he apehtlaih deuh mi kha atawinak in ka vun ttial.

 

3.Meeting tuahnak nih aa tinhmi :

01.Meting zohdawh le felte in tuah khawhnak

02.Mi tam deuh hnatlaknak in biakhiah khawhnak

03.Mi tlawm deuh duh nak kha hmaizah piaknak

04.Meting a kaimi pohnih biachim khawhnak le biatung dirh khawhnak.

05.Meting a kaimi poh nawl ngeihnak i tluk ciokhawhnak.

06Bu dirhning le hruainak upadi phung suai thiamnak.

07.Biaceih ding agenda suai thiamnak.

08.Chairman le a dang hruaitu hna nih an rian an i theih khawhnak.

09.Meting akaimi hna nih zodawh zohrem tein biachim thiam nak.

10.A caan ngeihmi chungah biakhiah khawhnak.

11.Biaceihmi ttialning le biakhiah thiamnak te hna asi.

 

4. Meting timhlamnak :

01.Metingsawmnak ca kuatding, acaan le ahmun fiangtein tialding.(groups mail ah meting hlan zarh khat hlan in thlah chung ding).

 

02.Ceih dingmi agenda kha Pastor, Churh chairman le Secretary hna nih tthatein Khrihfabu caah ceihawk aherhmi kha an tuah cia lai. Khrihfabu tthanchonak caah chunmang tthattha an manh lai i, ceihkhan awk ah an chuahpi lai. Timhcianak tthatein an ngeih ahcun biaceih khuakhan tikah rian a fawiter deuh.

 

03.Meting kaimi cazin, biaceihmi tialtiu, tialning, aningcang tein tuahding.

04.Meting he a pehtleihmi poah ttha tein ruah cia le timhlamh dihding. Timhlamnak a tthat ahcun aningcang tein akal kho i meting tuahmi sual lam a ngeih pin ah a kaimi zong an i nuam.

 

5.Chairman rian:

Meting chairman an thiammi nih an tuan ahcun meting anuam i biakhiah a fawi. A kaimi zawng an i nuam i Khrihfabu caah tthahnemnak a chuah pi. Meting a tluan khawhnak ah chairman cu a biapi ngai mi asi. A rian a biapi deuh hna cu:

01.Meting dawhte le remtein a kal khawhnak nga a rian ngan bik asi.

02.Mithmai in si seh, kaa in siseh meting a kai mi cungah duhdannak a ngei lai lo. Biakkhiahnak dik a chuahkhawhnak a zuam lai.

03.Daihnak le upat awktlak mithmai put aa zuam lai.

04.Meting chimmi bia kha tthatein ngaih le theihpiak aa zuam lai.

05.Biaceihmi agenda pial lo tein kalpi aa zuam lai.

06.Biapi le biate a tthenhai a thiam lai.Caan a upat mi asi lai.

07.Ruahnakkhaumi le lungsaumi asi lai.

08.Bu hruainak phung upadi a thiammi asi lai.

09.Bia tamtuk achim lai lo.Midang lung fiangnak caah a herh ahcun fiangter lai.

10.Bia achim rih lomi caan pek le ruahnak hal aa zuam peng lai.

11.Khrihfabu cungah dawtnak le siaherhnak nganpi a ngei lai.

12.Meting a kai mi thinlung theih khawh a zuam lai.

13.Meting tuah tikah Pathian duh nak kha kawl le ruah peng aa zuam lai.

14.Bia chim le ceihhmai a duh ahcun a bawmtu kha chairman a ttuanter lai.

15.Me a zat sual ahcun biakhiahnak a tuah lai.

16.Buainak a um sual ahcun daiter aa zuam lai.(MBC ahcun buainak a um sual tikah Judson siangbawi a ihkhun ke kha sobul ah an siam i,meting a buai ahcun voithum tiang a cumh lai i cu hnuah ahohmanh chim khawhnak a um ti lo. A herh ningin chairman nih meting kha a thawn khawh lai).’

 

6.Meting a kai mi hna an rian

Meting a kaimi hna hi a baipi tuk mi an si. Pakhat cio nih thil ttha a chuah khawhnak nga an i zuam cio lai. Khrihfabu dawtnak thinlung he bia kha an chim lai. A biapi deuhmi hna cu:

01.Ceihmi akong agenda an theih lai. Thei setsai loin a chim lai lo.

02.Midang bia chim mi ttha tein an ngaih lai.

03.Bia dawh lo bia chiakha an chim lai lo. Bia dawh holh dawh an hman lai.

04.Pumpak ngiarnak , zapi caah theih nuam lomi chim an hrial lai.

05.Chairman kha upat hmaizahnak an ngei lai.

06.Ceih liomi bia he aa pehtlai lomi an chim lai lo.

07.Minung hawi he biaceih asinain Pathian a kaive ti kha ngalh peng ding.

08.Bia chim an duh tik ah chairman hna tlaknak an lak lai. Kutthlir or Chairman ti in au hma sa ding.

09.Agenda ceih liomi pakhat ah voihnih cung dir lo a ttha bik.

10.Meting chungah thin hun,thin tawi lo ding, ipalh a fawituk. Bia chim tik ah phungchim (tazahawt) phun in chim lo ding. Tawi fiang in chim le a duhnak te lawng kha a fianter lai.

11.Midang an chim lioah dirchih, chimchih na hmang lai lo. Zapi hnatlakmi kha cohlankhawh a zuam lai.

12. Bai lu thaw thleidan khawh na zuam lai

13.A dong tiang meting kai le caan upat aa zuam lai.


Kommentarer

Kommentera inlägget här:

Namn:
Kom ihåg mig?

E-postadress: (publiceras ej)

URL/Bloggadress:

Kommentar:

Trackback
RSS 2.0